Ukrayina ve Rusiye ilk yaz ayınıñ 9-nda bir qaç kün devam etecek arbiy esirlerni deñiştirmege başladılar, dep bildirdi ukrayin lideri Volodımır Zelenskıy.
"Şimdi qaytarılğanlar arasında — yaralı ve ağır yaralalılar ve 25 yaşından kiçikler bar. Esnas bayağı mürekkep, pek çoq hassas detal bar, muzakereler aman-aman er kün devam ete", — dep qayd etti o.
Zelenskıy, İstanbulda muzakereler vaqtında tizilgen gumanitar añlaşmalar tolusınen yerine ketirilecegine ümüt etkenini bildirdi.
Koordinasion ştabnıñ malümatına köre, bugün evge 25 yaşına qadar azat etilgen arbiylerniñ birinci gruppası qayta.
"Bugün azat etilgenler arasında Arbiy-Deñiz quvetleri, Qara quvetleri, Teroborona quvetleri, Ava quvetleri, Desant-ücün orduları, Sıñır hızmeti, Milliy gvardiya ve Devlet mahsus naqliyat hızmetiniñ vekilleri bar. Azat etilgenlerniñ episi adiy asker ve serjantlar", — dep bildire ştab.
Berilgen malümatqa köre, azat etilgenler arasında üç yıldan ziyade esirlikte bulunğan Mariupol qoruyıcıları bar.
Bundan ğayrı, elâk olğan ukrayin arbiyleriniñ cesetlerini repatriatsiya etüv işleri devam ete.
Bundan evel, ilk yazayınıñ 9-da Rusiye Mudafaa nazirligi de deñişim aqqında bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
