Keçken afta quvetçiler işğal etilgen Aqyarnıñ bazarlarından birinde satıcılar ve alıcılar arasında tintüv keçirdi. Neticede 13 insan Rusiye arbiy komissarlıqlarına celpname alğan, dep aytıla Ukrayina prezidentiniñ Qırım Muhtar Cumhuriyetindeki temsilciliginiñ esabatında.
"Aqyarnıñ bazarında keçirilgen reyd vaqtında esas diqqat arbiy esapqa aluvğa ayırıldı: esapqa alınmağan 13 insanğa işğalcilerniñ arbiy komissarlığına kelmek mecburiyeti ile celpname berildi", — dep aytıla haberde.
Qayd etilgenine köre, bu kibi teşkerüvler Qırımda muntazam sürette keçirile ve tek bazarlarnı degil de, qurucılıq meydançıqları, musafirhaneler, klublar, parklar ve insanlar toplaşqan diger yerlerni de qaplap alalar.
Temsilcilikniñ malümatına köre, keçken afta Qırımda Rusiye Silâlı quvetleriniñ "diskreditatsiyası" maddesine istinaden protokollarnıñ sayısı arttı: 1382 adise qayd etildi, keçken afta ise 1350 edi. 1218 davasında mahkeme qararları çıqarıldı, ya da davalar birleştirildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
